Veikindi og aðrar fjarvistir

Leikskólinn er ætlaður full frískum börnum og gert er ráð fyrir að þau taki þátt í öllu starfi bæði úti og inni. Þess vegna getum við ekki tekið á móti veiku barni. Börn sem eru veik eiga að vera í rólegheitum heima þar til þau eru frísk og geta tekið virkan þátt í öllu starfi leikskólans. Ef barn fær smitandi sjúkdóm á það að vera heima þar til smithætta er liðin hjá. Við getum ekki komið til móts við beiðnir um fyrirbyggjandi inniveru þar sem það stangast á við stefnu leikskólans um útiveru barna.

Foreldrar verða að sækja veik börn í leikskólann svo að veika barnið komist í rólegt umhverfi og til að minnka hættu á að önnur börn og starfsmenn smitist.

Ekki eru gefin lyf í leikskólanum nema um sé að ræða lyf sem þarf að taka að staðaldri eða astmalyf. Foreldrar ræða við deildarstjóra um tilhögun lyfjagjafa sem upplýsir svo annað starfsfólk.

Það er ekki hægt að koma í veg fyrir veikindi með því að vera inni. Útivera er hluti af starfsemi leikskólans og börnunum mjög mikilvæg. Við stefnum að því að hvert barn fari út hið minnsta einu sinni á dag og útiveru er ekki sleppt nema í algjörum undantekningartilfellum. Þau börn sem eru inni allan daginn eru í sama loftinu allan tímann og ná ekki að hreinsa lungun, styrkja sig og efla.

Við biðjum foreldra vinsamlegast að láta leikskólann vita ef barnið er veikt. Samkvæmt reglum Leikskóla Reykjavíkur þá eiga börn sem hafa verið veik að vera heima í tvo daga eftir að þau eru orðin hitalaus. Undantekningar þarf að ræða sérstakleg við deildarstjóra. 

Það er einnig gott að vita ef barnið ykkar fer í frí hvort sem það er í einn dag eða lengur.